Pitutur lan Baos Pamuput
13:1—13:25
Pitutur Mangda Setata Satya
13
Sapatutne ragane sami setata saling welas asih sareng pengiring sane lianan. 2 Sampunang ja lali nerima warga tamiu ring umah ragane yadiastun dereng kenal. Wenten makudang anak maparilaksana sekadi punika, nanging ipun nenten sadar sedek nerima para malekat. 3 Tur sampunang ja lali ngrunguang anake sane kakrangkeng ring buine antuk ngrasayang indik ragane pada sedek kakrangkeng sareng ipun. Kenten pada, inget ja kapining anake sane keras kasengsarain antuk ngrasayang indik ragane pada sedek kasengsarain sareng ipun.4 Ragane sami sapatutne ngajiang pejangkepan ragane, tur lanang wiadin istri musti nyaga kasucian pejangkepan ipune. Krana anake sane cabul lan mamitra jagi kaakimin olih Sang Hyang Pengardi. 5 Sampunang ja ragane loba kapining jinah, nanging marasa genep ja kapining pagelahan ragane padidi. Krana Sang Hyang Pengardi masabda sapuniki,
“Nira tusing sajan bakal nepin cening;
keto masih Nira tusing sajan bakal ngutang cening.” Pengeling-eling 31:6
6 Punika mawinan iraga prasida matur,
“Sang Hyang Pengardi sane dados Penulung titiange;
titiang nenten ja jejeh.
Manusane nenten ja mresidayang malaksana napi-napi kapining titiang.” Kidung 118:6
7 Eling ja ragane kapining para pemimpin sane ngajahin sabdan Sang Hyang Pengardine buat ragane. Pinehang ja sekadi napi carane ipun maurip lan padem tur tulad ja kapracayaan ipune. 8 Sang Hyang Yesus Kristus setata pateh, saking idumun, mangkin, lan salamin-laminne. 9 Sampunang ja ragane kadadosang inguh paling olih pengajah-ajahan sane soleh-soleh. Becikan yening manah ragane pageh krana swecan Sang Hyang Pengardi, nenten ja krana awig-awig indik ajeng-ajengan. Paindikane punika nenten ja maguna buat ragane.
10 Iraga madue tugu aturan pengampuran dosa, inggih punika kayu salib Sang Hyang Yesuse. Nanging para rsi idumun sane ngayahin ring Tenda Suci Mabaktine nenten polih duman aturan pengampuran dosa saking tugune punika. 11 Rah beburon aturan pengampuran dosa kabakta olih rsi penglingsir agung ring Rong Maha Sucine. Nanging bangken beburone punika katunjel adoh saking genah anak Yahudine nyujukang tenda-tendannyane. 12 Punika mawinan Sang Hyang Yesus pada nandang sengsara ring jaban pamedal kotane. Sekadi punika Ida seda buat nyuciang para kramane nganggen rah Idane praragan. 13 Sane mangkin, ngiring ja iraga luas ring Sang Hyang Yesus ka jaban kotanea; irika iraga kanistayang sekadi Ida kanistayang. 14 Ring jagate puniki, iraga nenten madue kota sane langgeng; iraga nyantosang kota sane jagi rauh. 15 Punika mawinan, ngiring ja iraga setata ngagungang Sang Hyang Pengardi. Paindikane punika kalaksanayang antuk babaosan iragane sane ngajiang parab Idane. 16 Lan sampunang ja ragane lali malaksana becik tur nulungin anak lianan. Parilaksana sekadi punika dados aturan sane nyenengin Sang Hyang Pengardi.
17 Tinutin ja para pemimpin ragane lan misadya ja nglaksanayang pengajahan ipune. Krana ipun setata nyaga ragane mangda ragane suang-suang pageh maurip rohani. Tur ipun madue tanggung jawab ring ajeng Sang Hyang Pengardine. Sane mangkin banggiang ja ipun nuntun ragane mangdane pakaryan ipune ngasilang sukarena. Sampunang ja ngewehin ipun, krana paindikane punika nenten maguna buat ragane.
18 Setata ja nunas ica buat tiang sami, sane nulis surate puniki. Tiang sami pracaya unteng manah tiange sami murni, krana ring sekancan paindikan, tiang setata meled malaksana napi sane patut. 19 Sane utama tiang praragan nunas kapining ragane: tunas icayang ja tiang, mangda Sang Hyang Pengardi gelis ngutus tiang malih sid ragane.
Pinunas lan Salam Pamuput
20-21 Tiang nunas icayang ragane ring Sang Hyang Pengardi sane dados sumber dame. Dumogi ja Ida jagi ngicen ragane sekancan paindikan becik sane perluang ragane. Tatujone mangda ragane sida nglaksanayang pikayunan Idane. Sang Hyang Pengardi sane nguripang Sang Hyang Yesus, inggih punika Sang Ratu Agung iragane, turmaning Pengangon Agung buat para biri-birin Idane. Sang Hyang Pengardi nguripang Ida, krana Ida ngaturang rah Idane. Rah Idane punika ngawitin prajanjian anyar sane langgeng salamine. Tiang pada nunas ica sekadi puniki: mangda Sang Hyang Pengardi jagi nglaksanayang napi sane nyenengin Ida ring dewek iragane malantaran Sang Hyang Yesus Kristus. Dumogi ja Ida kaagungang kantos salamin-laminne.
22 Para semeton sareng sami, tiang nunas mangda ragane sabar nerima sekancan pitutur ring surate sane tulis tiang puniki. Yadiastun surate puniki nenten ja lantang.
23 Tiang meled ragane uning yening semeton iragane I Timotius sampun kabebasang saking buine. Yening ipun gelis rauh mriki, ipun jagi nyarengin tiang singgah sid ragane. 24 Nikayang ja salam tiange majeng ring pemimpin ragane lan makasami krama suci Sang Hyang Pengardine. Para semeton saking Italia pada ngaturang salam kapining ragane sami. 25 Dumogi ja wara nugraha saking Sang Hyang Pengardi nyarengin ragane sami.